Rydych chi yma: Cynllunio >Pwyllgorau Cynllunio

Pwyllgorau Cynllunio

Pwy sy’n eistedd ar y Pwyllgor Cynllunio a Mynediad?

Mae 18 Aelod yn perthyn i Awdurdod Parc Cenedlaethol Eryri, ac maent hwy oll yn eistedd ar y Pwyllgor Cynllunio a Mynediad (mae manylion pob aelod ar wefan yr Awdurdod). Mae un Aelod yn gweithredu fel Cadeirydd y cyfarfod. Bydd y Swyddogion Cyfreithiol a Chynllunio yno.

Pa mor aml mae’r Pwyllgor yn cyfarfod?

Mae’r Pwyllgor yn cyfarfod unwaith y mis fel rheol, a hynny ar ddydd Mercher.

Lleoliad - Plas Tan y Bwlch, Maentwrog

• 20 Mehefin 2012 am 10.00 y.b.
• 18 Gorffennaf 2012 am 10.00 y.b.
• 1 Awst 2012 am 10.00 y.b.
• 5 Medi 2012 am 10.00 y.b.
• 17 Hydref 2012 am 10.00 y.b.
• 14 Tachwedd 2012 am 10.00 y.b.
• 12 Rhagfyr 2012 am 10.00 y.b.
• 23 Ionawr 2013 am 10.00 y.b.
• 6 Mawrth 2013 am 10.00 y.b.
• 24 Ebrill 2013 am 10.00 y.b.
• 22 Mai 2013 am 10.00 y.b.
• 26 Mehefin 2013 am 10.00 y.b.

Beth sy’n digwydd cyn y Pwyllgor?

Mae rhaglen yn cael ei chyhoeddi tri diwrnod cyn cyfarfod y Pwyllgor, sy’n cynnwys adroddiad ar bob un o’r ceisiadau cynllunio a fydd yn cael eu hystyried. Mae’r adroddiadau unigol yn cael eu paratoi gan y swyddog cynllunio sy’n ymdrin â’r cais penodol hwnnw. Bydd yr adroddiad Cynllunio’n nodi:

• manylion y cais
• crynodeb o unrhyw wrthwynebiadau neu gefnogaeth a gafwyd
• asesiad o’r cynnig gan roi ystyriaeth i’r cynrychioliadau hyn yn ogystal â Chynllun Lleol Eryri
• argymhelliad yn nodi a ddylid gwrthod y cais ynteu ei gymeradwyo.

A yw’r rhaglenni a’r adroddiadau ar gael i’r cyhoedd eu harchwilio?

Ydynt, ar y wefan yma, ym mhencadlys yr Awdurdod, llyfrgelloedd cyhoeddus, trwy’r Cynghorau Cymuned a lleoliadau eraill. Petaech yn dymuno gweld adroddiad neu fynychu cyfarfod, mae’n bwysig eich bod yn cysylltu â phencadlys yr Awdurdod i gadarnhau’r dyddiad y bydd y cais yn cael ei ystyried.

Yng Nghyfarfod y Pwyllgor

Cewch fynychu unrhyw gyfarfod o’r Pwyllgor fel arsyllwr. Mae croeso i chi hefyd wneud cais i siarad yn y cyfarfod yn unol â’r canllawiau a nodir yn y daflen Siarad yn Gyhoeddus. Cynhelir holl gyfarfodydd y Pwyllgor trwy gyfrwng y Gymraeg ac fe ddarperir gwasanaeth cyfieithu ar y pryd i’r Saesneg.

Bydd y drafodaeth ar y ceisiadau’n dilyn y drefn a ganlyn:

Bydd y Cadeirydd yn datgan y cais

Bydd swyddog cynllunio’n cyflwyno’r cais i Aelodau’r Pwyllgor ac yn adrodd am unrhyw wybodaeth ychwanegol a ddaeth i law

• Gwrthwynebydd i annerch y Pwyllgor
• Cyngor Cymuned i annerch y Pwyllgor
• Ymgeisydd / Asiant / Cefnogwr i annerch y Pwyllgor
• Cwestiynau’r Aelodau a thrafodaeth
• Cynnig
• Unrhyw newid
• Pleidlais.

Pa benderfyniadau all y Pwyllgor eu gwneud?

Bydd y Pwyllgor yn gwneud un o’r penderfyniadau a ganlyn fel rheol mewn perthynas â cheisiadau a roddir ger eu bron:

• caniatáu gydag/heb amodau
• gwrthod (gyda rheswm dros wrthod)
• gohirio er mwyn cynnal Ymweliad Safle
• gohirio er mwyn trafod
• gohirio nes ceir rhagor o wybodaeth.

A yw’n bosibl i’r Pwyllgor wneud penderfyniad sy’n groes i argymhelliad y Swyddog?

Ydi, mae gan y Pwyllgor Cynllunio a Mynediad yr hawl i wneud penderfyniad sy’n groes i argymhelliad y swyddog cynllunio, ni waeth os yw hynny ar gyfer gwrthod neu ganiatáu’r cais.