Mae prinder tai fforddiadwy yn fater cenedlaethol ac yn un o’r heriau mwyaf sy’n wynebu nifer o gymunedau yn Eryri.
Nid yw Awdurdod Parc Cenedlaethol Eryri’n adeiladu tai, ac nid yw ychwaith yn awdurdod tai. Serch hynny, fel yr Awdurdod sy’n gyfrifol am gynllunio ym Mharc Cenedlaethol Eryri, rydym yn ceisio sicrhau bod adeiladau newydd neu drosiadau o fath sy’n angenrheidiol i bobl sy’n byw ac yn gweithio’n lleol.
Rydym yn gwneud hyn drwy:
• ein polisïau yng Nghynllun Datblygu Lleol Eryri ac ein Canllaw Cynllunio Atodol ar Dai Fforddiadwy
• cefnogi gwaith y ddau Hwylusydd Tai Gwledig sy’n gweithio ar ran y cymunedau lleol i gynnal arolygon ar anghenion o ran tai, a dod o hyd i atebion wedi’u teilwra i fodloni anghenion tai lleol a bennwyd. Mae Hwylusydd Tai Gwledig ar gyfer y rhannau hynny o’r Parc Cenedlaethol sydd yng Ngwynedd, ac un arall yn gweithio yn ardal Conwy.
• gweithio’n agos ag awdurdod tai lleol Gwynedd ac awdurdod tai lleol Conwy.
• gweithio’n agos â’r cymdeithasau tai sy’n gweithredu ym Mharc Cenedlaethol Eryri, sef Cymdeithas Tai Clwyd yn ne’r Parc ac yn ardal Conwy, a Chymdeithas Tai Eryri yng ngogledd y Parc. Mae gan y cymdeithasau hyn eiddo i’w rhentu neu i brynu cyfran ohonynt, neu gallwch gofrestru eich diddordeb mewn perchenogaeth Cartref Fforddiadwy gyda hwy.
Mae tai fforddiadwy’n cynnwys tai rhent cymdeithasol, tai rhent fforddiadwy a thai canolradd, sy’n cael eu darparu i aelwydydd cymwys ag angen o ran tai. Rhaid i ddarpar feddianwyr tai fforddiadwy hefyd fodloni’r meini prawf person lleol. Mae’r diffiniad o ‘angen o ran tai’ a ‘pherson lleol’ yn ymddangos ar dudalen 75 o Gynllun Datblygu Lleol Eryri.
I gael esboniad o ddiffiniadau tai fforddiadwy Llywodraeth Cymru yr ydym ni’n eu defnyddio, edrychwch ar Nodyn Cyngor Technegol 2: Cynllunio a Thai Fforddiadwy Llywodraeth Cymru.
Rydym yn defnyddio cytundebau cyfreithiol, a elwir yn Gytundebau Adran 106, i sicrhau bod tai’n parhau i fod yn fforddiadwy i berson lleol, nid yn unig ar gyfer y preswylydd cyntaf, ond hefyd ar gyfer trigolion eraill yn y dyfodol.
Rydym wedi paratoi rhestr wirio ar gyfer ymgeiswyr sy’n bwriadu cyflwyno cais cynllunio am dŷ fforddiadwy i fodloni anghenion lleol.
Rhestr Wirio ar gyfer Ymgeiswyr sy’n cyflwyno cais cynllunio am Dai Fforddiadwy.
Canllaw Cynllunio Atodol ar Dai Fforddiadwy
Ffurflen angen o ran tai fforddiadwy
Mae copi o gytundeb cyfreithiol Adran 106 ar gael gan Adran Gyfreithiol yr Awdurdod.
Nodyn Cyfarwyddyd ar Gyngor Cyn Ymgeisio i ddarpar ddatblygwyr. Mae’r nodyn hwn yn cynnwys gwybodaeth bellach ynglŷn â sut i gael cyngor cyn ymgeisio, cyn mynd ati i gyflwyno cais cynllunio.
Awdurdod Parc Cenedlaethol, Swyddfa'r Parc Cenedlaethol, Penrhyndeudraeth, Gwynedd LL519DX
Ffôn: 01766772274 e-bost: parc@eryri-npa.gov.uk www.eryri-npa.gov.uk